Numbers 10

Siliva kibidia

1Lohiabada ese Mose ia oda henia, ia gwau, 2“Kibi rua do oi karaia, hama dekenai idia botaia siliva dekena amo. Idia be do umui hiriria, taunimanima do oi haboudia gwauraia neganai, bona kamepa do umui kokia neganai. 3Bema kibi ruaosi idia hiriria lata neganai, Israela taudia ibounai be oi dekenai do idia haboua, Palai Dubu ena iduara dekenai. 4To kibi tamona do ia hiriria lata neganai, Israela gunalaia taudia, iduhu edia lohia taudia sibona do idia haboua oi dekenai.

5“Bema kibi idia hiriria kwadogi bona regena bada neganai, kamepa ena dina daekau kahana dekenai idia noho iduhu taudia ese edia palai ruma bona kohu do idia kokia, do idia huaia lao. 6Bema kibi idia hiriria kwadogi bona regena bada nega rua neganai, kamepa ena diho kahana iduhu taudia ese edia palai ruma bona kohu do idia kokia, do idia huaia lao. Kibi idia hiriria kwadogi, regena bada gaudia, be kamepa toreisi ena toana. 7To taunimanima haboua totona, kibi do idia hiriria lata.

8“Kibi be Arona ena natuna tau ese do idia hiriria. Emui kibi taravatuna be inai, hari ia lao bona nega ibounai. 9Bema umui dekenai idia tuari henia taudia ese emui tano dekenai umui idia hadikaia, bona umui idia tuari henia neganai, kibi do umui hiriria kwadogi, to mai regena bada. Unai neganai lau, Lohiabada, emui Dirava, ese umui do lau laloa, bona umui do lau hamauria, umui idia hadikaia taudia dekena amo.

10“Emui moale dinadia neganai danu, emui hua matamatana guriguri aria, bona emui guriguri aria haida dekenai danu, umui ese kibi do umui hiriria. Emui gabua ore bouboudia bona maino karaia bouboudia umui henia neganai danu kibi do umui hiriria. Unai neganai lau ese umui do lau laloa bona durua. Lau be Lohiabada, emui Dirava.”

Israela taudia ese Sinai tano idia rakatania

11Lagani iharuana, hua iharuana ena dina namba 20 dekenai, ori ese Palai Dubu, Lohiabada ia noho ena toana, ia rakatania, ia daekau lao. 12Israela taudia ese Sinai ena taunimanima noho lasi tano idia rakatania hamatamaia. Ori be ia lao, ela bona Parana ena taunimanima noho lasi tano dekenai ia ginidae. 13Israela taudia ese edia kamepa gabuna idia rakatania nega ginigunana be unai, bona Lohiabada ese Mose ia hamaoroa dalana dekena amo idia raka lao.

14Iuda iduhu taudia be idia raka guna edia pepe henunai, mai edia iduhu tuari orea toi: Iuda iduhu tuari orea, edia gunalaia tauna be Nasona Aminadaba. 15Isakara iduhu tuari orea, edia gunalaia tauna be Netanele Suara. 16Sebuluno iduhu tuari orea, edia gunalaia tauna be Eliaba Helona.

17Vadaeni Palai Dubu idia kokia, bona Geresone bona Merari iduhu taudia ese idia huaia lao.

18Idia edia murinai, Rubena iduhu taudia, edia pepe henunai idia raka lao, mai edia tuari orea toi: Rubena iduhu tuari orea, edia gunalaia tauna be Elisuru Sedeuru. 19Simeona iduhu tuari orea, edia gunalaia tauna be Selumiele Surisadai. 20Gado iduhu tuari orea, edia gunalaia tauna be Eliasapa Reuele. 21Vadaeni Kohata taudia ese kohu helagadia idia huaia. Kamepa matamata do idia ginidae lasi neganai, Palai Dubu be Levi taudia haida ese gabu matamata dekenai idia haginia lou guna vadaeni.

22Idia edia murinai, Eparaima iduhu taudia, edia pepe henunai, idia raka lao, mai edia tuari orea toi: Eparaima iduhu tuari orea, edia gunalaia tauna be Elisama Amihuda. 23Manase iduhu tuari orea, edia gunalaia tauna be Gamaliela Pedasuru. 24Beniamina iduhu tuari orea, edia gunalaia tauna be Abidana Gideoni.

25Vadaeni murina dekenai idia mai iduhu idia raka lao, Dano iduhu taudia ese idia gunalaia, mai edia tuari orea toi: Dano iduhu tuari orea, ena gunalaia tauna be Ahiesere Amisadai. 26Asere iduhu tuari orea, edia gunalaia tauna be Pagiele Okarana. 27Bona Napatali iduhu tuari orea, edia gunalaia tauna be Ahira Enana. 28Israela taudia idia toreisi negadia ibounai edia laolao dalana be unai bamona, orea ta ta dekena amo idia raka lao.

29Mose ese iena nakimi Hobaba Reuele, Midiana tauna dekenai ia hereva, ia gwau, “Ai ese laolao ai hamatamaia inai, Lohiabada ese ai dekenai ia gwauhamata vadaeni ai dekenai do ia henia tano dekenai do ai lao. Unai dainai oi danu do oi mai, bona namo do oi davaria, badina be Lohiabada ese ia gwauhamata vadaeni, gau namodia momokani dekena amo Israela do ia hanamoa bada.”

30Hobaba ia haere, ia gwau, “Lasi, lau be umui danu do lau lao lasi, egu tano korikori dekenai do lau giroa lou, egu varavara dekenai do lau lao.”

31Mose ma ia gwau, “Mani emu kara ai do oi rakatania lasi, badina oi be taunimanima noho lasi tano ena kamepa gabudia namodia oi diba, bona oi ese ai oi hakaua diba. 32Bema ai danu oi mai neganai, Lohiabada ese ai dekenai do ia henia gau namodia, be oi danu do ita haria.”

Israela taudia idia toreisi

33Unai neganai Sinai, Lohiabada ena ororo idia rakatania, bona dina toi idia raka lao. Lohiabada ena Taravatu Maua danu be dina toi lalonai idia edia vairana dekenai idia huaia lao, edia laga-ani gabuna ia tahua. 34Dina neganai, kamepa dekena amo idia toreisi nega ibounai, Lohiabada ena ori ese edia ataiai dekenai ia noho.

35Taravatu Maua idia huaia lao hamatamaia negadia ibounai, be Mose ia hereva, ia gwau:

“Lohiabada e, oi toreisi,
oi dekenai idia dagedage taudia do oi hadikaia.
Oi dekenai idia badu henia taudia do oi lulua lao.”
36Bona Taravatu Maua idia atoa diho neganai, ma Mose ia gwau,

“Lohiabada e, Israela bese taudia momo momo herea,
dekenai mani do oi giroa mai.”